Angni Gibi Konthai Kwina

"खैना"

     

नों माब्ला फैखो...!

बुंसनो हाया I

आगुनि ना; देग्लाइनि-

मिथिसनोबो मानोबा हाया !!

साथ जोनोमनि; साथ पेरे,

बिबारि एमाव बाबेन लांना-

सबा-सब गुस्थि सिग्लाबजासे खुदुमनाइ;

मेगन बेखेवब्ला गान्दुआसो सिग्लाबो I

सि........... ! सि...........!

लाजिथाव बाथ्रा,

गुबुन मेगननिसो हाबा ना-

नंगौ, सान्थौआव जेथो-देबोर !!!

होमबाबो मानोबा-

गोसोआव जिलिदसे निराला मोन्दांथि, 

.....बेथ मोकथांनि जाथाय!

सानावल माब्रै नुजायो!!

अमबासि हराव बबेयाव थाङो?

हरखाबै गोग्लैयो

बिबारि एमनि सावगारि-

बियोथ आंनिनो साइखं!!!

(आं,-आरो-नों

गौरां दैमानि साखाथि-

आवजार बिफांनि सिंआव,

सुदेम बिख्लोनि बारजों बिरफानाय राव

............ गोबोरकि बायदि?

नों रागा जोंदों नङासे सना:

सासे पाग्लानि थ'र्ख गोनां सावगारि

खारै - खारैनो थाथना

उन-सिगां; आखि-आगदा

सायखंखौ थाखोमानो नागिरनाय 

दानिया नोंनो बुंदो?

साइखंआ माब्रै गावि जुदा

सुबुंनि अनागार आखु रूजुनो बोरै!)

तर्क’ -- सानस्री

माब्ला फैखो दुखुनि खोथा:

बेखौ नों मिथिनाय नङा सना;

नाथाय-

रूजुयोबा पुरनिमा अखाफोराव जोमै

मा तर्क बेयाव दं?

स’ना आं जेबोखौनोबा साना I

बन्थ’ मुराफोरा फैबोला लांनो

आं स’ना सिखांनो नाजाया;

खोमसि रायजोआव-

मोजायसेबो मेगनजों स’ना नोंखौ नुखाया I

थायो आंनिनो गोर्बो सिबायाव

गेलेगोन स’ना हेलु-मेलु,

गोबालायना बिखाजों-बिखा,

हौवा गोदान; हिन्जाव गोदान महरै

जेब्ला मिथिंगानि मिलौदो सुपिनाव गोरोबगोन!

          ........🤔🤔🤔🤔.........

                                        लिरगिरि-

                                                नार्ज्जारी, बल'राम